اراجوز

 جيبتلي صاحب وحبيته

زقنى فى المترو زقيته
واما مات فيا ومت انا فيه
روحتله بيته وعزيته !!
حزن يا بقال ورا الجامع
هات بنص ريال عسل فى الكوز
دة اللى كان عيل بقى شاعر
واللى كان ضاحك بقى أراجوز

حبنى الشارع وحبيته
عض قلبى الليل وعضيته
خضنى الأنسان وخضيته
لما بان من وشه عفاريته

عدى فيا القمح سمرنى
عدى فيا الفجر صبرنى
عدى فيا الحزن غيرنى
عدى فيا العمر كبرنى
خدنى م اللفة لمريلتى
خدنى م التسنين لحصالتى
خدنى من مدرستى ع الجامعه
خدنى م الترعة على الاسفلت

خدت م الاتوبيس مراياته
خدت م السواق حكاياته
خدت م الركاب تذاكر موت

حزن يا بقال ورا الجامع
هات بنص ريال عسل فى الكوز
دة اللى كان عيل بقى شاعر
واللى كان ضاحك بقى أراجوز
ياللى وحشانى متوحشنيش
ضحكك السكر محلانيش
خوفت م المطرة قفلت الشيش
ليه فضل اسمك على الشباك

كنت جايب دبلة وغويشه
كنت شارب حاجه مغشوشه
شفت شبهك قاعده فى الكوشه
قلت هى لا مش هى
فتشتنى الدمعه عن الميه
كنت أنشف من حطب محروق

حزن يا محول خطوط سيرى
حزن يا عطار فى باب اللوق
شوفلى تحويجه لتفسيرى
حط ريحه بُن لضميرى
شوفلى عود أصلب من المغشوش
حزن يا بقال ورا الجامع
هات بنص ريال عسل فى الكوز
دة اللى كان عيل بقى شاعر
واللى كان ضاحك بقى أراجوز

ردنى عالباب عطب روحى
جابلى ناى وزتونه مطروحى

جيبت لي صاحب وحبيته
زقنى فى المنرو زقيته
واما مات فيا ومت انا فيه
روحتله بيته وعزيته

ردنى عالباب عطب روحى
جابلى ناى وزتون مطروحى

مُر انا يا صاحبى لو دوقتنى
جيت اقول الآه ما صدقتنى
يطرح ايه الملح غير مالح
يطلع ايه م الجرح غير مجروح

ليه ما تصفاشى لغير صافى
ليه فى عز الحوجه بتجافى
شوفتنى غاطس ولا طافى
كنت بندهلك حلاوة روح

حزن يا بقال ورا الجامع
هات بنص ريال عسل فى الكوز
خد سنين الجرى وسنينى
هاتلى سن غزال دهب عينى
قطع الاسفلت شرايينى
هات بياض القطن شاش اللوز

حزن يا بقال ورا الجامع
هات بنص ريال عسل فى الكوز
دة اللى كان عيل بقى شاعر
واللى كان ضاحك بقى أراجوز

بس عشته

انا عمري ما حبيت اليأس بس عشته
وعمري ما حسيت الفرح ولا دقته
انا الاسير اللي جواه حر ساكت
احلامه يأست منه ومن صمته

يمكن اكون بصفي بكلمه قريبه
او حتي نظره خارجه بحنيه
ده يمكن انسي احزاني بطبطه
خارجه من قلب يكون خايف عليه

انا اللي قلبي عايش توهانه
محتار بيدق ولا نبضه مات
انا ف مكان مش عارف عنوانه
ومش لاقي حل ويا السكات

كمان بقيت الاقي الكلام ساكت
قولته او لا مبقاش فيه تغيير
حتي روحي جوايا حساها شابت
بعد ماكنت بحلم ف يوم أطير

ياجرح جوه قلبي شايفاك متبت
قولي علي دواك وسبني اعيش
او خلص عليه ويبقي اسمي ميت
ماهي كده كده الحياه عندي متساويش 

رانيا الجبالي                                                                                                                               

نفسى اتوب انا من الذنوب

داين تدااااااان

اللي يبيع حد عشان راحته
يبقي جبان
واللي يغلط فيك بعد ما سامحته
مش انسان
واللي ضحك عليك بعد ما سمعته
اكيد خوان
سيبك انت المهم اي قلب انت طمنته
يدعيلك بالأمان
وخليك فاكر ف كل اللي عشته
كلمتين " داين تدان "

رانيا الجبالي 

مش ثورة

 

ده اندفاع مش ثوره
ناس حابه تبين مصر عوره
لو معتصم ارجع ميدانك
واصرخ بعلو صوتك مصر حره

من غير ما تحسب او تفكر
اهتف ونادي يسقط العسكر
لكن تهد فيها ادام وزاره بتحميها
يبقي انت رايح عشان  تدمر

انا ضد ان دمك يسيل
او حد بايديك يصبح قتيل
انا مع الحق اللي ضايع
ومحتاج تكون له انت الدليل

 
رانيا الجبالي

يعني تكون انسان

 

عارف يعني ايه تكون اشه
لواحد غرقان
يعني كنت ملكش لازمه
وبقيت انسان

يعني يبقي جواك حزين
وبركان خلاص هيتفجر
وتخرجه ضحكة من غير انين
وتقوله انا عليك هقدر

يعني تشيل ايد من ع الخد
كان شايل هم وعايش وحيد
والايد دي تكون ايد اي حد
تعرفه او لا قريب او بعيد

عارف يعني ايه تعيش لغيرك
تضحك وضحتك تكون عنوان
عارف يعني ايه توزع خيرك
حتي لو كنت فقير غلبان

يعني بضحكه بتفرح حزين
او بكلمه تواسي انسان
او حتي ورا الامام بتقول امين
وبتدعي يارب محتاج أمان ..

رانيا الجبالي