الخميس، 29 ديسمبر، 2011

انا في حماك يارب


يارب 

انا ظني فيك ملوش حد 
جوايا هم مالي القلب 
ومش حابه اشكي همي لحد 
غير للي عرفني معني الحب 

يارب 

انا مش طالبه غير رضاك 
ولا بحلم غير بالجنه
هو فيه بعد هداك 
طب ايه تاني ممكن اتمني 

سلمت امري ليك ووهبت 
حياتي اعيشها عشان غيري 
بحبك ونفسي اشوفك وكتبت 
بحب اشوف في عطفك خيري 

يارب 
انا عزتي في ذلي ليك 
وقوتي في ضعفي ليك 
وغناي في فقري ليك 
ونفسي اموت من غير ذنب 

يارب انا في حماك 
علشان كده حاسه بأمان 
وبتمني يوم ما ألقاك 
اسجد ويكون لي بين عبيدك مكان 

ياااارب 
انا في حماك يااارب



الأربعاء، 28 ديسمبر، 2011

حلم ...


مجرد حلم بتحلم بيه وتقوم بعده مرتاح جدا يمكن من حلاوة الحلم تتمني ان محدش يصحيك بس للأسف في النهايه هتلاقي حد بيفوقك ويقولك اصحي ارجع تاني للدنيا بتاعتك ارجع لوحدتك ارجع ليومك لكل حاجه بتعملها 
حلم ...
يمكن بالنسبه لاي حد حلم عادي وعدي لكن بالنسبه لصاحب الحلم فهو حلم مستحيل ينساه ويمكن يدعي ربنا كتير انه يكون رؤيا وانه يتحقق بس في النهايه ياتري ايه اللي بيخلي الحلم حلو " شخص شفته فيه - حاجه اتمنيتها ومش لقيتها في الحقيقه - وضع تاني - ولا حلمت بأنك شخص تاني " 
مهما كان الحلم فهو رفض للواقع اللي انت فيه أمل في واقع تاني 
مش هقول بقي اني مؤمنه بأن الأحلام زي ما قال فرويد عنها انها رغبات مكبوته لكن اوقات بحس ان الهروب من الواقع للحلم ده عجز عن انك تعيش الحياه انك تتفاعل مع الناس 
المشكله ان الحلم طول معايا اوي لدرجة يمكن تخوف خلقت عالم تاني صحيت فيه ناس بحبهم ستي وناس راحوا من الدنيا انا عايشه معاهم في الخيال رسمت صورة لكل اللي حواليه حتي اللي سابوني ومبقوش يفكروا فيه ولا في حالي هم معايا في العالم ده ساعات بقول ده جنون بس لما بقاوم الخيال ده وارجع للواقع بتصدم بيه وبحسه صعب 
انا شايفه الناس مهما عملوا ملايكه 
انا بديهم اكتر من عذر حتي لو الموضوع متعلق بالكرامة 
انا اضعف من اني اخاصم حد او اجرحه حتي لو هو عمل ده 
بحس سعادتي لما حد بيضحك بضحك عشان ضحكته 
يمكن اكون بشوف ضحكتي في ملامح اي حد تاني غيري 
حبي لجرحي جارحني لاني بحس نفسي ضعيفه
عصبيتي وتسرعي خانقني بأسي بسرعه وكمان بصفي في ثانيه 
شايفه العالم من زاويه مختلفه شويه عن الناس يبقي ده معناه ان العيب مش في الناس 
جوايا احلام ساعات بتبقي تهور نفسي في حلول لكل مشاكل الناس خصوصا الأطفال 
وبصرف النظر عن كل العيوب اللي فيه دي مش بطلب من الناس او اي حد بتعامل معاه غير انه يديني الأمان أيوه الأمان هو ده اللي نفسي فيه 
اتعامل معاك بدون حذر بدون خوف من غدر منك 
انا عارفه ان كلامي كتير سطحي وموجود ويمكن يكون مستهلك بس زعلانه جدا من ناس كتير حواليه اتمنيتهم بصفات احسن وملقتهمش 
بس صورهم مش قادره اشوفها في العالم اللي هم عايشينه 
صورتهم في العالم الخيالي اللي فيه ناس يمكن يكونوا فارقونا 
انا عايشه حلم لاني حاسه بالعجز والتعايش في العالم الحقيقي بأشخاصه الحقيقين 
ما أروع العالم المزيف :(

رانيا الجبالي  

الثلاثاء، 27 ديسمبر، 2011

خلصت خلاص


اما انت قلب
عمال تأن..
وتحن..
وتزن..
وعايش في حزن..
ومحدش داري من الأساس 

شاطر تحب 
وتحب بجد..
وتخلص لحد..
وتوفي بوعد..
وياريت غيرك عنده احساس 

من الاخر قلب 
متعب لصاحبه ..
سايب اللي بيحبه ..
ورايح لتعبه ..
لا ياقلبي خلصت خلاص 

همنع حنينك 
ولو مقدرتش هوقف نبضك 
يسكت أنينك 
ويمكن ارتاح من كل الناس
خلصت خلاص  
rania


السبت، 24 ديسمبر، 2011

أحلي حــــاجه

احلي حاجه
لما القسوه يجي بعدها حنيه
واما الدنيا تسود شويه بشويه
وفجأه يجي ضي الأمل
ويخلي النور مالي عنيه

مش هحس بسهل لو قبله سهل
أما الصعب لما يجي والاقي الحل
احس اد ايه حلاوة الحياة
وحلاوة العلم لو قبله جهل

لو اتنسيت من حد وسابني
وكان بينا وعد وخاني
مش عيب فيه او عليه
العيب هو حسن ظني

مش ساعات تشتاق للشمس ونورها
وتلاقيها غرقانه وسط الغيوم
الشمس مش بتبقي حبه ظهورها
علشان مبتحسش بيها كل يوم

يبقي الناس مش زي ما تحب
لما تقرب تلاقيها وتبعد لا
قبل ما تفكر في الناس تحب
فكر ازاي تسعدهم في الحياه

احلي حاجه
لما القسوه يجي بعدها حنيه
واما الدنيا تسود شويه بشويه
وفجأه يجي ضي الأمل
ويخلي النور مالي عنيه

rania elgebaly

الجمعة، 23 ديسمبر، 2011

شيخ الشهداء



بلاش دموع يا امـــــــــى
فى اهــــــــم كتير حاجات
اتحقق بعدى حلـــــــــــمى
ولا مع موتى مـــــــــــــات
احكيلى انتى الاول
انا لو حكيت هطـــــول
ماعشان بحب بلــــدى
كان لازم تضحيات
ايوه موت لمصـــــــــــر بلدى
احلى موته ده انا الشهـــــــــــيد
بس وحـــــــــــــــــــــياتك قوليلى
ان فيها حصــــــــــــــــــــل جديد
لما موت دة كان تحدى
انى اجيب الخير لمصـــــر
مش علشان مصلحتى وحدى
ولا نفسى اعيش فى قصـــــــــر
هو انا سايبك لوحــــــــدك
دة انتى ام لاى حــــــــــــــــد
اى مصــــــــــرى هتندهيله
هتلاقينى فيه بجــــــــــــــــــد
بلاش دمـــــــــــــوع يا امى
فى اهم كتـــــــــــــــــير حاجات
اتحقق بعدى حلمـــــــــــــــــــــــــــى
ولا مع موتى مـــــــــــــــــــــات
اطمنى يا امــــــــــــى
فى لســــــــــــه فيها ناس
غـــــــــالى عليهم دمى
شيلى دموعك خلاص
يمكن مش هتشوفينى
فى البيــت مش هتلاقينى
ابتسمى بقا يا امــــــــــــــــــــى
دى مصـــــــــــــــــــــــــــــــــــــر ...
دى مصــــــــــر هى الاســــــــــاس

الخميس، 22 ديسمبر، 2011

هقولك ايه ...


هقولك ايه 
ميهمش....
انك تحب ومتتحبش
او تتحب ومتحبش
او تحب وتلاقي حبيب
بس النصيب ميحبش

انك ترسم أماني وفيها تدوب
وتعيش في حلم ميكملشي
وهنعمل ايه ده المكتوب
بيقولك يابني متحلمشي

بتشوف افلام كتير بنهايه تحبها
وتتمني لو يحصلك زيها
وتكره حياتك عشان لوحدك
وتلاقي اليأس عشش فيك بعدها

معقول تعيش حياتك عشان نهاية
عشان لقطه مستنيها من البداية
طب ما تعيشها وزي ما تيجي
ويمكن تعيش احلي حكايه

متعش عمرك عشان لحظه بتحلم بيها
او انسان يشاركك فيها
بس عيش واحلم وقول يااااااارب
انت اللي خالقني
وحياتي في حبك هلاقيها
لو بحب هاحب فيك كل البشر
عشان الدنيا من غيرهم ميتعش فيها
..
rania elgebaly

الأحد، 18 ديسمبر، 2011

توقف ...



صديقتي حاولت كثير أن أكتب بعيد عن أي شيئا حدث ولكني لم أقدر لذا سأتوقف عن الكتابة لحين عودة الروح لي 
عندما أقدر علي التغلب علي إحساسي وعلي أشياء كثيرة في حياتي سأعود 
أشكرك علي مجهودك معي بعد ما قمت بالغاء مدونتي القديمه ولم اجد اوفي من قلبك بجواري وقمت بتشجيعي علي انشاء اخري ولكني خذلتك  
ساعدتيني كثيرا وقمت بالدعاء لي كثير ولكن هناك شئ مازلت أفتقده في نفسي وفي الناس لذا سأحاول جاهده البحث عنه وبعدها سأعود مع إنني أعلم تماما أن الوصول لليقين يعقبه تماما الموت 
لك مني كل الحب  :)

رانيا الجبالي

السبت، 17 ديسمبر، 2011

حـــــــــنــــــيـــــــن

 
حنين
يمكن لسلام لكلام
لاي حاجه والسلام
يمكن لجمله لكلمه
لعبه حتي لو ممله
او حتي حلم من الاحلام

حنين
ليوم بتاعنا
او شوق تبعنا
لقلب باعنا
يمكن لهمسه لنسمه
لقلب قلبك بيحبه لسه
ورافض في حبه الاستسلام

حنين
لجرح منه
لبعد عنه
يمكن لصوته سكوته
لصرخه رافضه في قلبك موته
او نظره من غير كلام

حنين
لدعوه حلوه
او حتي غنوه
يمكن لحزن او لظن
او حتي لشوية ان
تحس فيهم انك تمام

حنين 
يمكن لسلام لكلام
لاي حاجه والسلام
يمكن لجمله لكلمه
لعبه حتي لو ممله
او حتي حلم من الاحلام 

rania 

الجمعة، 16 ديسمبر، 2011

ترس صغير


صوت الابله هويدا مغطي علي المكان هي صحيح قصيرة نوعا ما لكن صوتها وشخصيتها لا ولما بتسمع علم النفس اللي انت حفظته من المنهج تنسي حرف يبقي نهارك مش فايت هتتشدي من شعرك حصلت معانا كتير بس في النهايه عمرنا ما حبينا علم النفس غير لما هي شرحته وعمرنا ما حبينا مدرسة ادها في الدروس 
" يشعر الفرد بأنه ترس صغير في آله كبيره وهي المجتمع  " 
الكلمة دي كانت بتقولها وهي بتشرحلنا يعني ايه احباط واكتئاب ودلوقتي الكلمه دي جايه في دماغي جدا يمكن اكون بحاول اوهم نفسي بكياني وبأملي في الحياه بس لحظات وبتروح تاني 
ببص حواليه علي حال البلد وببقي عاجزه عن التفكير 
ببص لتصريحات بعض اللي بيقولوا انهم محللين وبحس بجد انهم محرضين 
مع الثوار ومع الثوره ومع العداله الاجتماعيه ونفسي يتحقق الهدف ده ومع ذلك حاسه بعجز 
مع اطفال الشوارع او اطفال بلامأوي واللي اتظلموا جدا من وصف تهاني الجبالي اللي قالت انهم هم اللي مخططين للي بيحصل النهارده 
ولو ده حقيقي فهقولها العيب عليكي وعلي أمثالك من المسئولين الأغبيا اللي اكيد ضربين حاجه قبل ما يقولوا الوصف ده  وعلي النظام السابق اللي ما اهتمش بيهم 
اول لما الثوره نجحت وبدأت احس ان هيبقي فيه نظام وجيشنا حامينا وشفت النهارده صور ليه وهو بيضرب في الستات ومش مهتم هي كبيره ولا صغيره هي ضعيفه ولا مش مهتم بيضرب من غير وعي زي ما اكون اتحول هو نفسه لعصايه وقلبه مات او ميت من الاساس
ببص للجمعيات الأهليه وشغلها وعدم اهتمامها بالأطفال اللي فيها وابقي عاوزه اكسر الدنيا وفي النهايه مش بعمل حاجه 
ببص للشحاتين اللي في الشارع وببقي عاوزه اعرف ظروفهم وهم ليه كده ومش بعرف اعمل حاجه 
ببص لكل الناس حواليه اللي متخانق ومخنوق من حياته واللي علطول في خلاف مع مراته ومع اسرته ومش بعرف اعمل حاجه 
ببص لبنات من سني واصبحوا مطلقات وما استمروش في الجواز اكتر من شهور وبزعل جدا وبرضو مش بعرف اعمل حاجه
ببص للمسنين اللي في دور المسنين وبشوف اد ايه اتجننوا من الوحده وبرضو مش قادره اعمل حاجه 
ببص للمرضي النفسين في العباسيه واللي كل حد فيهم له حدودته وبرضو مش قادره اعمل حاجه 
انا مش عاوزه اعمل كل حاجه بس علي الاقل حاجه واحده
انا زهقت من قلة حيلتي  
يخربيت كده الكلمه عماله تتردد في ودني معقول انا ترس صغير طيب لو جمعتني الظروف بناس زي تفكيري هنبقي مجموعة تروس صغيره ولا هنبقي ترس كبير 
المشكله في ايه بالظبط في أن المجتمع بيشكله مجموعه من الافراد ومع ذلك لو الافراد متجمعين بيبقوا تروس صغيره يعني مش بيبقوا كتله واحده 
معقول هفضل اقول كتير .. أنا ترس صغير:( 

               رانيا الجبالي

الخميس، 15 ديسمبر، 2011

لو ماتت رانيا ....


يوه بقي ... اتخنقت .. زهقت .. جبت أخري 
معلش إستحملوني واستحملو عصبيتي ماهو انا شايفة ان مفيش حاجه حلوه
شايفه أن الدنيا ضالمه مع ان الشمس بتطلع كل يوم 
شايفه ان الحياه مره مع ان فيها حاجات حلوة 
شايفه الناس بوشين لا بوشوش كتير مع انهم في نظري طيبين 
تفتكروا ممكن حد يفكر في الموت أنه يقول " يارب أموت
ليه ؟؟ 
عشان أناني ..
 أيوه اللي يدعي بده أناني ومبيحبش غير نفسه وبس من غير دهشه 
هلاقي حد بيقول بيحب نفسه ازاي وهو عاوز يخلص منها 
هقول برضو هو أناني خليك معايا 
فكر ممكن يحصل ايه لو دعائك ده اتحقق 
علي سبيل المثال 
بتقوم الصبح تقول لوالدتك صباح الخير وتضحك في وشها 
تلاقي باباك بيفطر ويضحكلك ويتحايل عليك تفطر قبل كوباية الشاي عشان تروح شغلك تمام 
بتلبس وغصب عنك أخوك يصحي من نور الأوضة ويتخانق شوي وفي الأخر بتغطيه تمام وتبوسه وتمشي 
عم محمد بيقابلك في الطريق الغفير بتاع الأرض اللي جنبك يمشي معاك شويه ويحكيلك أد ايه الجو برد ومعدش أمان زي الأول وإنه كل يوم بيشوف حراميه وانت بتواسيه وتضحك معاه 
طول الطريق ماشي بتقابل ناس يمكن متعرفش اد ايه أنت مهم في حياتهم حتي لو مش بتكلمهم مجرد ضحكه منك بتريحهم 
حتي لو ماشي في الطريق لوحدك وبتتامل في كل حاجه حواليك هتلاقي نفسك بتردد سبحان الله 
أوقات كنت بفكر هو ليه الإنتحار حرام ؟؟ 
عادي حد زهقان من حياته ومش عاوز يعيش ايه المشكله انه يريح نفسه ويموت مش عندي حق ولا ايه ؟؟
لا طبعا مليش حق حياتك مش بايدك ... مش عشانك لوحدك يمكن تكون مش عشانك اصلا لا عشان رساله انت جاي ليها 
رساله بتنفذها وبتمشي مش من حقك انك ترحل براحتك لان دي أنانيه 
وطالما فكرت تنتحر يبقي يئست من رحمة ربنا وازاي هتطليها يوم القيامه وفي الآخره وانت يئست منها في الدنيا !
لو ماتت....
مين هيضحك في وش اله ويصبح عليهم 
مين أمه هتناديه بأبن عمري أو بنت عمري 
مين من الأطفال هيشوف فيك حلمه وامله 
قبل ما تفكر في الموت فكر ممكن يحصل ايه بعد موتك
فكر ازاي تعمل حاجه تبقي عايش في قلوب غيرك يبقوا مستنين ضحكتك ولما تيجي سيرتك يدعولك ويقولوا الله يرحمه 
كنت بفكر كتيييير لو متي يارانيا ايه ممكن يحصل ؟؟
ولا حاجه ........
لقيت اني قبل ما افكر في الموت لازم أكون مستعده له 
أيوه في اي وقت يجي مخافش منه عشان كده لازم أقرب اكتر من كل الناس حواليه وادعي ربنا 
اني موتي يبقي هداية لغيري 
اني اموت شهيده أو اموت وانا بدافع عن كلمة حق 
يعني تموت في عز حبك للحياه او انك بتدافع عن حق غيرك في الحياة مش وانت زهقان منها ويائس من رحمة ربنا 
طالما يائس من رحمة ربنا في الدنيا متطلبهاش في الآخره وشوف انت ممكن يحصل ايه من غير الرحمه دي يوم القيامه 
الرحمه دي هي اللي هتخلينا بدل ما ندخل النار ندخل الجنه 
الرحمه دي هي اللي بتأجل دعائنا عشان يجي لنا حاجات احلي وعشان في النهايه نسأل نفسنا 
تخيل لو مت ممكن يحصل ايه ؟؟
وبعد ما تتحيل وتكتب هتعرف انت اد ايه مهم في حياة غيرك ...
هتعرف يعني ايه تعيش عشان غيرك يدعيلك ان ربنا يخليك في وقت تكون انت بتدعي يارب أموت 
تحب تكون أناني ولا ....................
رانيا الجبالي     

الاثنين، 12 ديسمبر، 2011

مشاعر مهجورة 2

 
أحلي حاجه في الشتاعندها 
بيغسل الناس غصب عنها 
يعني بشوف علي الحقيقه وشها 
مليان ميه وبرئ من جرحها 
واحلي حاجه في الناس وقتها 
بيقفوا جنب بعض يتحاموا 
ناس كتير من غير ما تعرف اسمها 
عشان كده الشتا عندها 
أحلي فصل في السنه كلها
 
معدش ينفع حتي اني اعاتب 
الصاحب اللي ميحسش بيك
ميبقاش صاحب
الصاحب اللي ميسألش عليك
وعلي مشاعرك مش بيحاسب
مينفعش يتعاتب
بحب كل عبيدك فيك
وفي كل صلاه بدعي ليهم
يارب قربني دايما ليك
وابعدني عن شر ماليهم
مستغربين لاني بضحك وانا مجروحه
ومفكرين ضحكي حلاوة روح مدبوحه 
ومش عارفين ان الرحمن بينور قلبي 
وحبه خلي الامل ادامي شبابيك مفتوحه
القلب اللي مخلوق عشان يدق
عشان حياة الجسم اللي فيه
يبقي في الحياه ملوش حق
والاحسن انه يتقفل عليه
القلب أجمل ما فيه
شوية الرحمه اللي فيه
الحب يبقي مغطيه
الاحساس يبان عليه
قلبك عشان غيرك يعيش بيه
وقلب غيرك عشاانك
لو قلبك عشت انت بيه
محدش هيحس يوم بأحزانك
رانيا الجبالي

الخميس، 24 نوفمبر، 2011

مشـــــاعر مهــــجورة

مش اي حد يحب حاجات بتحبها
يبقي ليك
ولا اي ناس تلاقي الامان عندها
تحس بيك
اوقات نختار حاجات نحسها
مفيهاش حنيه
وتلاقي ربك جابلك احسن منها
وبزياده شويه
فارضي مفيش حاجه تستاهل تقف عندها
مادام ربنا راضي عليك
أوقات كده بقول نصيب
محدش عارف ايه في الغيب
مين هيجي تاني في حياتنا
ومــــيــــن هــــيــــغـــيـــب
مين هيكون سبب جراحنا
ومين بايده جراحنا تطيب
مين اللي خان الود بينا
مين اللي كان عليه العيب
والاخر بضحك واقول نصيب
نـــــــصــــيـــــب
أحلي حاجه في المشاعر حزنها
تعيش فيها ليالي وتحسها
وساعات كتير تفكر وتسرح
ياتري اللي بتحبه هو كمان بيحبها
واخاف من ايه
طب هزعل ليه
ايوه راضي باللي اتقسم
وهو اللي اتقسم انا احلم بيه
دي حكمة رب كريم بدعيه
بيجبلي اكتر من اللي نفسي فيه
رانيا الجبالي 

كام طفل

 
 
في كــام دار
فـيه كــام طفل
عيونه بتبكي نار
احلامه عليها قفل

فيهم ميعرفش اسمه ايه
فيهم محسش عمره بالأمان
فيهم اللي الزمان جه عليه
وحرمه من انه يكون له كيان

مش ابن حرام ولاذنبه
يجي الدنيا من غير شهاده
بس اتنين عمرهم ما حبوا
جابوه وامه يادوب تعبت ف الولاده

اسمه هيهمك ف ايه
انسان اتعامل معاه
ومتقولش يوم عليه
دا ابن حرام ومين لقاه

فــي كــام دار
فـيه كــام طفل
عيونه بتبكي نار
احلامه عليها قفل

دعوه للتعامل مع الاطفال بانسانيتهم وليس بأسمائهم أو اصلهم فالاصل فينا التعامل والسبب في ماهم فيه نحن فلا نحملهم ذنب لم يرتكبوه
رانيا الجبالي

الأحد، 13 نوفمبر، 2011

روح غريبة



 الحر هو من يخلق عالم يحيا فيه بعيدا عن البشر 
تلك هي كلماتها التي دائما ما ترددها فهي لاتريد الخروج من عالمها الذي خلقته لتحيا فيه والذي خلقت فيه أيضا عائله وأناس كثيرون حتي تستطيع الحياه في عالم متكامل ، هي الان طريحه للفراش في احدي المستشفيات غائبه تماما عن عالمنا تحيا في عالمها يحاول كل من يعرفها أن يعيدها الي وعيها ولكنها مستسلمه بطريقه غير عاديه لغيبوبتها فتجد أبيها يمسك بيدها ويذكرها أنه لن يغضبها بعد الان ولن يجعلها مجبره علي فعل شئ ، هي لاتعير لهذه الكلمات اي اهتمام لأن ابيها في عالمها لا يحدثها وانما ينظر لها نظرات أب لايريد سوي السعاده لابنته لا يعدها بشئ بل يترك كل شئ للظروف فيكفيها ابتسامته التي تشعرها بأن الدنيا جميله بدون وعود يترك الاب المجال لوالدتها فتستخدم الام سلاح كل الامهات وهو البكاء والمناشده ليحن قلب ابنتها ولكن البنت تبتسم وكلما زادت أمها في البكاء ابتسمت هي فتتذكر وتقارن بين امها التي اخذتها لجارتها لأجرء عملية الختان وهي لاترحم دموعها والتي اجبرتها ان تتزوج من شخص لتكون مجرد جسد يملكه غيرها ليخرج فيه كل أمراضه النفسيه فيها وبين أمها التي تحتضنها بعيونها في كل الاوقات وتتذكر بالرغم انها قاربت علي العشرين الا ان أمها التي تبكي علي سريرها لم تحتضنها ولو لمره في حياتها سوي يوم زفافها حتي في هذا اليوم أحتضتنتها لتعرف هل سيقتنع زوجها بها ام لا ؟! أصوات مختلفه داخل الغرفه الصغيره في المستشفي ولكنها لاتسمع منها شئ فهي تستمتع بالاشجار وتقطف الورود المنتشره في شوارع عالمهاولكن شئ ما جعلها تنتفض تصرخ هل هي صحوة الموت أم عوده الي الحياه ؟! تنادي الام علي الطبيب يجتمع اقاربها حول سريرها وهي تصرخ وتبكي من ايقظني ؟! من أيقظني ؟! تنظر الي يدها فتجد دماء تسيل علي أصابعها ينظر أقاربها بدهشه الي يدها فلا يوجد اي شئ يسبب أصابتها وهي تبكي وتقول " كنت اظن أن عالمي بدون أشواك قطفت الورده ولم انظر تحتها ولكن حديقتي في عالمي ملكي وملك لكل الناس لا احتاج الي المال لادخلها وكيف أحتاج المال والعالم عالمي حديقتي لايوجد بها أشواك أنتم من زرعها حاولت التخلص من كل شئ يربطني بعالمكم ولكن تركتم لي بقايا منه "
الكل يبكي حولها ولكن دموعهم ليست عليها فقط وانما علي انفسهم يستمر المشهد لساعات ترحل بعدها الشمس عن عالمها وعالمهم ليموت عالمها ويبقي عالمهم يتردد فيه صوت المنادي ينادي عليها لقد رحلت ولن تعود مره اخري الي أي عالم.

السبت، 12 نوفمبر، 2011

بس ارضي



اوقات كده بحس اني اتمنيت حاجه وجتلي حاجه تانيه خالص ولما بفكر في اللي كنت بتمناه بلاقيه صغير اوي جنب الحاجه اللي جتلي اتمنيت مثلا اني يادوب انجح وجبت تقدير عالي اتمنيت اني اروح رحله ومرحتش ولااتوبيس اتقلب بالناس في الطريق طبعا دي أمثله صغيره جنب الحاجات الكبيره اللي بنتمناها وبتجيلنا حاجات اجمل لما بنستني ونصبر ونبقي علي يقين
إن اللي جاي أحلي

الاحلي انك دايما تقول الحمد لله بصراحه كنت الاول أقول الذي لايحمد علي مكروه سواه بعد كده اتاكدت اني كنت غلطانه أصلا مفيش مكروه
مثال
بسيط حصلي وانا بمسح المطبخ ايدي وقعت عليها وقعه خفيفه قلت الحمد لله دا انا لو كنت وقعت جامد كانت ممكن اتكسرت وحتي لو اتكسرت الحمد لله انها ايد واحده وحتي لو الاتنين الحمد لله مش رجلي كمان وحتي لو جسمي كله الحمد لله اني ممتش وحتي لو مت الحمد لله ان ربنا اختارني في الوقت ده يمكن كنت اعمل
معاصي بعد كده
الحمد لله كنت بقولها عادي دلوقتي بقولها حساها اوي
واحده
صاحبتي اتمنت مثلا انها تتجوز حد معين وكانت بتدعي انه يبقي من نصيبها وهو اتجوز حد قريب منها وعرفت اد ايه ان ربنا بيحبها لانه شخص ميستحقش حبها
ممكن تكون بتحب حد اوي وتبكي علي وتدعي ربنا انه يكون من نصيبك وبتخسره وبتتعب بعدها بس بتفرح لما بتلاقي اللي جاي اجمل
ممكن يكون حد بيحبك اوي وانت مش واخد بالك منه وفجأه تلاقيك شايف فيه حاجات جميله وترتاح معاه
اقتناعي
التام ان ربنا اقرب لنا من نفسنا خالقنا فاهمنا فاهم تكوينا فاهم طبيعتنا بيدنا قلوب تحب وتجرب وتعيش وتحلم وتفشل وتنجح وبيدينا اكتر ما بنطلب بيحرمنا من حاجه بنكتشف بعد كده انها كانت هتضرنا
حب وعيش واحلم واتمني وانجح وافشل وادعي بس اهم حاجه الرضا
ارضي
ايوه ارضي
حب وارضي انك متبقاش مع اللي بتحبه
عيش وارضي انك ممكن تموت في اي لحظه
احلم وارضي ان حلمك ميتحققش وتحقق احلام تانيه تسعدك
اتمني وارضي ان اللي
اتمنيته يبقي مع حد تاني
انجح وارضي انك ممكن تفشل في وقت قريب
افشل وارضي انك اكيد هتقوم بعد فشلك حتي لو لوقت قصير
ادعي وارضي ان ربنا ياجل الاستجابه عشان يسمع صوتك تاني
ارضي انك تعيش راااضي اكتر من اي حد تاني
بس ارضي
اكيد فيه حاجه حلوه جايه ولو مجتش دلوقتي يبقي جايه بعدين ولو مجتش بعدين يبقي جايه في الجنه
اكيد الجنه
بس ارضي


الثلاثاء، 8 نوفمبر، 2011

يمكن



مش يمكن اكون محبتهاااش


وجه قلبي في لحظه وطااااش

ولقيتها بتخفف عني وتواسي

دا انا لحد دلوقتي مشفتهااااش




بس هي حابه تسمعني

ولو سبتها هتقول ده خدعني

مع اني حكيت لها احساسي

وقولت لها ايه ممكن يمنعني


سهل ادخل في حياتها واحبها

او احب حاجات جوه قلبها

او تعجبني طريقة تفكيرها

يعني اكون معجب بعقلها

لكن اعيش حياتي بين ايديها

اغير حياتي وتكون هي فيها

قلبي مفكرش يسيبها ويمشي

وبرضو مفكرش انه يكون ليها


rania 

الاثنين، 7 نوفمبر، 2011

أوقااااات

مش أوقات
تلاقي نفسك
مبتكلمش حتي نفسك
وعايش في سكااات
عمال تدور ف اللي فات
واللي بتدور عليه ناسيك
وانت فاكره طول الساعات

العيب مش فيه ولا عليه
العيب علي اللي بيفكر فيه
ايوه فيك وفي قلبك
انت ناسي انك أغلي منه
انت ناسي نفسك ولا ايه

الورده بتفضل ورده لما نرويها
وشوكها اللي بنكرهه هو اللي حاميها
والقسوه لو بتكرهها
أوقات بتخلي صاحبها يقوي بيها

مش هعاتبك علي ضعفك
بس صدقني اللي يحبك
يحب دايما يشوفك غالي
ويشوف الفرحه خارجه من قلبك
رانيا الجبالي

الأحد، 6 نوفمبر، 2011

دقــــــة قــــلــــب

 
 
القلب اللي مخلوق عشان يدق
عشان حياة الجسم اللي فيه
يبقي في الحياه ملوش حق
والاحسن انه يتقفل عليه
القلب أجمل ما فيه
شوية الرحمه اللي فيه
الحب يبقي مغطيه
الاحساس يبان عليه
قلبك عشان غيرك يعيش بيه
وقلب غيرك عشاانك
لو قلبك عشت انت بيه
محدش هيحس يوم بأحزانك