الأحد، 22 يناير 2012

قلبها دق


طول عمري أعرفها 
 ...ملامحها
 ...حزنها
...حلمها
بس عمري ما قربت من قلبها 
يعني معرفش جواه ايه 
ازاي حد يدخل فيه 
ازاي تخلي حد يحسها 
منكرش اني ساعات بشتاق لها 
واروح بسرعه أحكلها وأقولها 
حبيتي ... قلبك دق
ألاقيها تسكت وتبص لنفسها 
ودموعها تنزل غصب عنها 
 ولما اروح أقرب منها 
ألاقي سكوتها وأحس حزنها 
وف مره عادي بسألها 
قلبك دق ... حبيتي 
صرخت بأعلي صوت فيها 
احب ازاي وانتي مش سكناني 
فيه حد يحب وروحه في مكان تاني 
ازاي احب وانتي مفرقاني 
قربي مني قربي اكتر حساني 
بحلم وبدور وبصرخ سمعاني 
لما تبقي روحي ومش سمعاني 
مش حساني 
ازاي تطلبي مني 
احب حد تاني 
هتحب بروحها 
ولا بكيانها ولا بقلبها 
ومين يقدر يجمعها تاني 
يرجعها لنفسها 
ويبقي روحها وكيانها وقلبها 
مع واحد 
وساعتها هي تسأل نفسها 
حبيتي قلبك... دق
طول عمري أعرفها 
 ...ملامحها
 ...حزنها
...حلمها 
رانيا الجبالي

الجمعة، 20 يناير 2012

مشاعر مطلوبه


الراحه النفسيه دي اهم حاجه من زمان كنت بحاول أوصل لها بحاول اكون متزنه ومش مندفعه 
أكون هاديه مش متسرعه ولا عصبيه 
احكم عقلي قبل قلبي 
والنهارده ومش عارفه ليه النهارده حسيت اني وصلت لها 
حسيت اني لو مت هموت وانا مسامحه كل الناس وهدعي انهم كمان يسامحوني من اي حاجه 
حتي لو كلمه من غير قصد 
لو نظره ف وقت ضعف 
اي حاجه بقي المهم انا راضيه تماما عن حياتي بحلوها بمرها بكل حاجه فيها 
وبحلم في اخرها ان يكون ربنا راضي عني 
دايما كده كنت اقعد ادعي وادعي ومكنش اول الدعاء يارب ارضي عني 
مكنتش برتاح اوي بس كمان كان دعائي بيستجاب في اوقات وف حاجات ربنا بيبقي رايدها لي لانها هتنفعني 
لما بدأت اقول يارب ارضي عني وبعدها ارضيني حسيت اني ربنا بيحبني اوي وبيجيب لي حاجات اكتر مما اتوقع 
ومعلش علي اكتر مما اتوقع ف وسط الكلام يعني 
المهم النهارده صفحه جديده مع ناس كنت اتمني افتحها معاهم من زمان 
بحبكم في الله وسامحوني علي اندفاعي وسامحوني علي عصبيتي وانا مسمحاكم علي كل شئ 
وسامحوني كمان عشان ممكن اكون اتجاوزت حدودي ف اوقات مش هيحصل كده تاني
اشوفكم علي خير 
رانيا الجبالي

حوار مع ميت

 
"لا يقدر احد ان يهزم الظلام الذي يسكن الدنيا في الليل الا اذا اضاء شيئا يحترق ولكي تضئ الجزء المظلم في حياتك لابد ان تحترق لانك لن تجد من يحترق ليضئ لك حياتك"
كنت اسمع هذه الكلمات كل ليله وكانها صدي لصوت بعيد ولكن اين يسكن هذا الصوت وذات ليله قررت ان اتتبع هذا الصوت لاعرف اين يسكن مصدره نزعت من داخلي الخوف وتركت اذني تقودني الي مصدر الصوت واشرت بيدي الصوت من هنا ولكن يدي ظلت مرفوعه تشير ووجهي ينظر الي مصدر الصوت في ذهول انها المقابر الصوت من هنا المقابر
لا اري سوي مقابر يسكنها الموتي ولكن هل يوجد سكان للمقابر سوي الموتي
فوجدت الصوت ينادي "وهل الموتي يسكنون المقابر؟!!
سيطرت الدهشه علي كل ملامحي ولم افكر فيما قال لان تفكيري قد اصيب بالشلل فوجدته يكرر
"وهل الموتي يسكنون المقابر ؟ المقابر هي التي تسكن الاشخاص ابحث بداخلك ستجد مقبره ؟
كنت افكر في العوده من نفس الطريق ولكني لم استطع نظرت الي من يحدثني فوجدته ينظر لي نظرة سخريه وبدأت اساله
" هو انت ميت"
زادت نظرة السخريه علي وجهه وقال
"من زمان بس مش ساكن هنا"
تملكت الحيره من كل ملامحي
" انت مت بس مش ساكن هنا امال ساكن فين"
ضحك بسخريه شديده وقال
" بقولك مت هاسكن ليه "
واقترب مني فدب الخوف في قلبي فقال " ما تيجي معانا
فقلت" بس انا ساكن في الدنيا"
وكان ملامح السخريه اصبحت جزء من مظهره قال " ما حدش ساكن هنا "
طيب ايه رايك هسالك سوال لو جاوبت هاسيبك تسكن في الدنيا ولو معرفتش تجاوب هتيجي معايا "
فاوات براسي باالايجاب
فقال " انت ليه مش عاوز تيجي معايا " فنظرت له بدهشه
فوجدته يهدد " جاوب "
فارتبكت فامسكني من يدي وقال " جاوب "
فقلت " عشان انتو ميتين لكن انا لسه عايش
" فوجدته يصرخ في " مرتاح في الحياه دي "
فقلت لا فقال احنا مرتاحين
ساد الصمت لفتره ووجدت صوت اخر يقول " ضيف جديد "
فنظرت بدهشه " مين دول " فقلت لا بس دول بشر زي وزيك انت بتكدب عليه انت عايش " نظر لي نظرة تحدي وقال " بس انا اخترت اموت وما استنتش الموت لما يجي " نظرت له نظره سخريه ولكن ليس هذا وقت للسخريه فوجدته يبتسم وقال " انا كل يوم بنادي واقول لايقدر احد ان يهزم الظلام الذي يسكن الدنيا في الليل الا اذا اضاء شيئا يحترق ولكي تضئ الجزء المظلم بداخلك لابد ان تحترق لانك لن تجد من يحترق ليضئ لك حياتك
وكل مره اللي يسمعني يجي بس للاسف مبيرجعش تاني وجذبني بقوه لاحيا وسط زملائي الاحياء الموتي....
 
رانيا الجبالي

الخميس، 19 يناير 2012

اعتذر



اعتـذر ان كان فـي يــوم قـسـيـت
والعذر ان كـــان صديـت او جـفـيت
فأنت حد السيـف لامني اعــتـزيـت
وانت اغلى شخص في عمري لقيت
الوفـا فـي غيــر قلــبك مـالـقيـت
اعتذر

الأربعاء، 18 يناير 2012

مشاعر مش مطلوبه


ممنوع 
وفي النهاية القلب موجوع
مش من حقي احلم بيه
ولا من حقي اكون ليه
حتي اني افكر فيه
مش مشروع

  ابتسامه
مش معناها اني بضحك
او اني هموت م الفرحه
ولا معناها اخفف جرحك
او اضحك ع الدنيا الجارحه
 
يعني ايه اخاف اجرب
عشان كلمة فشل
ويعني ايه اخاف اقرب
ليبعد عني الأمل
أوقــــــات بحـــبها ..
بحــسها...
بموت في حضنها...
وكتير بكره غدرها
ماهي الدنيا كده
احسن لك واحسنلها
تعيش وبس
متعشي حابب حاجه فيها
حتي لو ممكنه مش بتوصلهاااا

الاثنين، 16 يناير 2012

..............

 
انا زعلانه وفرحانه
مبسوطة ومضايقه
مرتاحه وتعبانه
وهموت من الخنقة

سكت ومبقتش اتكلم
تعبت ومبقتش ارتاح
فرحت ومبقتش اتألم
جرحت ومبقولش سماح

عفريت جوايا بيتنطط
مع اني صلاتي بصليها
احلامي جوايا بتتخبط
وبقالي زمان برتب فيها

انا مضايقه بوش بيضحك
ومبسوطه وفي عيني دموع
انا مش قادره اني اسامحك
وقلبي بيظلم وبقول مخدوع

بحب الناس وساعات انانيه
فيهم امان والغدر اكتر
بغلط وبرمي غلطي علي النيه
ودايما قلقانه بس بصبر

انا زعلانه وفرحانه
مبسوطة ومضايقه
مرتاحه وتعبانه
وهموت من الخنقة
rania

الأحد، 15 يناير 2012

إلي أمي

ليه دايما حبه تعزفي ضحكتك
علي وتر احزاني
ليه مخبيه مني حنيتك
وجوه قلبك متوهاني
مع انك لو دورتي في سكتك
مش هتلاقي غيرك عنواني

عايزه فرح وهيصه ولمه
وفستان في نهايته طرحه
وانا نفسي منك بس ضمه
هتكون عندي اغلي فرحه
عايزه اقولك مره ياما
متأسيش عليه وتبقي جارحه

حلمك يمكن يكون شبه حلمي
بس الفرق اني عايزه اعيش
لاحد يتعبني ولا يكون سبب ألمي
ولا يكون في حياتي نيش
عايزه حد يبقي حامل همي
بيحبني وف حبه الحياه متساويش
عايزه حد سكنه يبقي دمي
ولو رصيده في الدنيا مفيش

ومادام حلمي بعد عنك
وحلمك فيه عايزاه يعيش
يبقي سيبيني لاني منك

ومن غير ضحكتك انا مفيش
رانيا الجبالي

الأربعاء، 11 يناير 2012

اوقات


أوقات كده بلاقيني 
مشغولة وفاضية ياعيني 
راسيه وتايهه وأتاريني 
خايفه وبسأل إيه مستنيني 
ارسم ضحكه وأقول راضيه 
دا الرضا نعمه بنصح بيها 
واتاري الكلمه من جوايا فاضيه 
يعني كلمة ولسه موصلتنيش معانيها

  بس
علي اد ما أقدر بحبها
وبحب كل اللي ساكن أرضها 
وبيأس كتير من ضعفي فيها 
بس الامل بلاقيه ف قلبها

رانيا الجبالي  

الأحد، 8 يناير 2012

صديقي ...




اذا رحلت الان فلاتحزن ولا تلوم نفسك فلقد سامحتك
فقط تذكر ما فعلته لي من اشياء اسعدتني وانا كذلك سأتذكرك
لن أتذكر جرحك مهما كان فأنت مثلي انسان
اذا رحلت فاعلم اني قد سامحت كل من أساء لي
لأنني اريد أن أقابل مصيري كالطفله بدون اخطاء
أريد أن تكون نهاية حياتي بداية لحياة آخرين
لا أريد أن اجعل الحزن يسيطر عليهم

لذلك ياصديقي ويارفيقي في حياتي وفي آخرتي مهما كانت صفتك بالنسبه لي
صديقي ... صديقتي ... حبيبي ... زميلتي ... أمي ... أبي ...أخي ... اختي
كل من كان في حياتي أسامحك واطلب منك أن تحيا مع غيرك برضا وصدق وتسامح

صديقي ...
كثيرا ما كنت لاتهتم وتسأل
وانا بالوحدة كنت أشعر
ولكن قبل أن أرحل
وأترك كل ما في الدنيا وأهجر

سأترك لك رساله رددها
في الله انا احبك
رساله قبل أن ترحل أتركها
لكل من سكن في قلبك
رانيا الجبالي 

انا ابن شارع

 
ابن شارع وملامحك فيه
بحبك ولو تمن حبك عنيه
هحبك عشان عارفك
وعارف ان القسوة
مش في شوارعك
القسوه جوه الناس اللي بتمر عليه

مصر..
دا انا مولود علي الرصيف
وياما حسسوني ان فيكي ضيف
وفضلت راضي بلقمه مرميه
وكتير كنت بنام خفيف

انا اخرب فيكي واحرق
صعبان عليه يقولوا بيسرق
دا انا لو بسرق كان بان عليه
دانتي موجك بيعلي وبرضي وبغرق

مصر ..
في ثورتك الناس كانت كتير
وانا كنت قاعد قبلهم في التحرير
ما انا من زمان في ثورة
وطول عمري بحلم اشوف فيكي خير

ايوه انا للي قالوا عليه ابن شارع
انا اللي اتهموني ان ليكي بايع
يامصر ابيع ازاي وانا ساكن شارعك
ونشيدك حواليه بيتردد وانا سامع
ولسه بتعامليني مجرم مش ضحيه
ابن شارع وملامحك فيه
بحبك ولو تمن حبك عنيه
رانيا الجبالي

الأربعاء، 4 يناير 2012

مشاعر مهجورة 3



 أنا زي الناس مش ملاك
ربنا خالقني عشان غيري
خالقني عشان أكون معاك
اشوف شرك وتشوف خيري
انت اخترت تعيش وبس
وانا اخترت اعيش لغيري
انت اخترت تكون لك دنيا
وانا اخترت الاخره مصيري
 
أوقات بحسها مفيهاش غير حاجات كئيبه
افتكر كل اللي حواليه واحس بخيبه
واصرخ بعلو صوتي انا مش لعبه
عشان تلعبوا بأحلامي ولا أنتم لعيبه
أنا أقوي منكم بس ضعفي طيبه
سكاتي مش رضا عنكم وعن الكلام
سكاتي عشان ما اتعودتش تطلع مني عيبه ...

 
 
احساس خنقة وفاق الحد
وكأن كيان جوايا واتهد
والدنيا ضاقت اكتر ماهي
وبقي بيني وبين الفرحه سد
يعني خلاص كده نسيني
طب اعمل ايه في حنيني
نفسي اشوفك ادامي واقولك
وحشتني منك كلمة وحشتيني

طب عامل ايه طمني
من غيري عايش متهني
ولا حياتك ناقصها قلبي
ولا ارتحت في بعدك عني ؟
ياقلبي كل ما بسكتك
وبين ضلوعي بثبتك
وبحاول اخد من قوتي
وارجعلك تاني قوتك
الاقي عيني دمعت
وروحي ليه ودعت
وحنينك لسه جواك
وجراحي للناس سمعت

ياقلبي حاول ترضي
عشان جواك يفضي
واخد منك قوتي
واعيش حياتي وارضي
رانيا الجبالي