الأحد، 12 مايو 2013

احلام عايمه




وحضنت قلبي اكتر واكتر
وبين ضلوعي خبيته
وكل ما كان حنيني يكبر
لحد ف يوم حبيته
أطبطب عليه واقوله اصبر

  هيجي يوم تقول نسيته
انا بقوي بيك خليني اقدر
علي جرحي واقول انا داويته



 


ف الحلم كنت بين ايديا
وحضنك كان بيتي وسكني
كنت جايب كل الدنيا ليه
كنت مطمنه اوي لزمني
واتمنيت لو افضل نايمه

  وتفضل معايا جوه حضني
بس طلعت دي احلام عايمه
وصحيت منها وحيده علي حزني

رانيا الجبالي 
 

عادي


فيه ناس بفتكرها وبرجع افتكر كانت في حياتي ايه واروح اشوف حالها دلوقتي الاقيها مش فاكره انه يمكن قابلتني في حياتها وعاشت حياتها عادي ماهو اصلا عادي لانك كنت في حياتهم من االاول عادي 
كنت ناويه اكتب كلام كتير لان احساسي النهارده عايز يتكلم ويكتب كتير بس للأسف من كتر زحمة حزنه سكت ولقي في الصمت راحة بال  
اللي حساه دلوقت هو احتياج للراحه  لايد تطبطب لحاجه تطمن عشان كده مفيش احسن من الدعاء

الجمعة، 10 مايو 2013

إلي مني ياسين

اتابع مدونتها باهتمام لانني اجد في كلماتها نور اجد الفتاه البسيطه التي تحب كل ما في الحياه ويسكن في قلبها رضا من الله
احب تفائلها برغم حياتها التي تحياها مثل اي فتاه في عمرها مثلي ومثل غيري ممن يعيشون في مدينتهم الفاضله ويصطدمون بواقعهم المرير باناس غيرهم يحاولون بقدر الامكان احتضان ما حولهم للحفاظ عليهم من الكسر ولكن لايمنع وقتها انهم يتحملون أذي دق الحجاره املا في واق اجمل
 وكالعاده فوجئت بموضوع اكثر من رااااااائع يحمل في طياته اشياء لمست قلبي
اشكرك كل الشكر علي تدوينتك واشكرك علي وجوده في حياتنا

لقراءة التدوينه

الأحد، 5 مايو 2013

الذكري بتوجع



ايا كانت الذكري لما بتحسها
او تمشي في مكان يفكرك بيها 
حلوه او مره لو تلمح ضيها
تقفل عنيك بدمعه وتعيش فيها 

لو حلوه تتمني لو ترجع 
وترجع تاني تعيش لياليها 
ولو مره تفضل فيك توجع 
وتأمر روحك بقوه خلاص انسيها

وكأن روحك غاويه تعاندك 
وشايفه الذكري حلوه في عنيها 
 وانت ياعيني حاضن قلبك 
ماهي الروح بتعشق ماضيها 

رانيا الجبالي

السبت، 27 أبريل 2013

عايش ولا ميت

بحب كل البشر بكل ألوانهم
واللون عندي مش شكل أبيض وأسمر
فيه ناس تخونك مهما تعمل علشانهم
وناس من غير ما تعمل ليك تقدر

فيه فرق بين كل واحد والتاني
ومتحكمش علي حد بالشر من مره
فيه واحد تشوفه تقول ده اناني
مع ان يمكن مكنش اناني غير مره

في المرايه بتشوف نفسك وبس
وحابب تكون ادام نفسك جميل الصوره
وصدقني لو كنت بغيرك بتحس
هتلاقي المرايه من كتر الوشوش مكسوره

صورتي مش شكل بيتبروز
او حد يشوفها ويقول الله
صورتي أكون في القلوب متبروز
واحاول علي اد مااقدر أشيل الآه

اللي يعيش عشان نفسه ميت
واللي يعيش لغيره لو مات حي
خلي يقينك بالله فيك متبت
 
وعيش بأمل ويقين ف اللي جاي
رانيا الجبالي

الجمعة، 26 أبريل 2013

مش حاسه بيك المره دي


بتكره ليه اكون وياك
واتكلم كلام عادي

في وقت مزاجك انت تقول
كلام في الحب مش عادي

ووقت ما يبقى جوايا
كلام بيهد جوايا

اقولهولك تقول عادي
خلاص عادي


لو الاحساس معاك وقتي
يريت تنساني دالوقت
مش حاسه بيك المره دي

بتلعب دور حبيبي ساعات
عشان محتاج لي اكون جنبك

وعلى كيفك بتنسى ساعات
في حد كتير بيحتاج لك
 

انا نفسي احب

انا نفسي احب
بتكلم جد وبحلم بحد :) :)

صـــــــــــــــــور

فضل القلب يدندن ويدندن
ويقول اه بحرقة ويخبط
اهدي ياقلبي اوعي تجنن
عاوزه اكتب بس الكلام ملخبط
والعين ما صدقت تترجم أهاته
دموع نازله منها بألم وحرقه

  ورعشة الجسم ما صدقت اناته
والروح لقيتها في حنينها غارقه
والعقل واقف بيضحك ومطمن
خدتي ايه من كلام قلبك ودقاته


 
النهارده روحي حست بحد
كلام مش هزار لا بجد
حسيت باني سكنت غيري
وروحي سكنت في قلب حد
فرحت مع اني معرفش مين
لكن فرحت عشان روحي عايشه
يعني قادره تسافر ويا الحنين
ودقات قلبي مش كلها طايشه


اوعي تبني حلمك ابدا علي حد
عشان لو سابك متنكسرش وتتهد
بس احلم ومتخليش لحلمك حد

  وخلي يقينك بالواحد الأحد
رانيا الجبالي

الثلاثاء، 23 أبريل 2013

بحب اتنين

بحب اتنين ... ايوه بحب اتنين ومش شرط يبقي عندي قلبين عشان أحبهم لا حبيتهم بقلب واحد ولسه بحبهم بالقلب ده 
صاحبي اول لما شفته كان ناقصني حاجات كتير صاحبته بقلبي الأول 
ولما حصل كام موقف بينا لقيته انسان مختلف وسألت نفسي ازاي حبيته أو صاحبته ومع ذلك بنفس القلب 
حبيته بنفس القلب بس مش نفس الشخص أو نفس الشخص بس مش نفس الطبع أو نفس الطبع بس مكنش باين أو كان باين بس أنا مكنتش شايف او كنت شايف بس كبرت دماغي عشان عايز يبقي لي صاحب 
 
معلش هي نظرية اكتشفتها من كام يوم بس حسيت انها واقعيه يمكن انا بس اللي حسيتها :)
بنفس القلب بتعمل حاجات كتير جدا 
بتتعود علي الناس بنفس القلب ... 
بتفارق 
بتكره 
وترجع تحن بنفس القلب 
المشكله مش في الناس اللي بتحبهم ومش بيستهلوا الحب ده 
المشكله في قلبك 
لما بيحب بيعمي عينك عن كل حاجه في اللي ادامك وتبرر كل افعاله وبتتغير علشانه بس في النهايه بيسيبك 
عشان هو شايفك صح شايف انك انت اللي محتاجله 
لكن انت شايفه غلط انت شايفه من وحهة نظر قلبك مجرد احساسك :)
المهم كبر دماغك من كل ده وخلي بالك من قلبك في كل حاجه بتعملها 
حب بس متكرهش 
وقول لقلبك ميهزرش
عشان هزاره يمكن يضحك 
لكن علي جرحه مبنقدرش
 
حبيبه 

الأحد، 21 أبريل 2013

الفرااااااغ



الفراغ شبح حاسبي منه 
كنت ساعات اقلب والاقي ناس ضايعه بسبب الفراغ والفراغ مش معناه اني مش بعمل حاجه ف حياتي بالعكس ممكن الانسان يكون يومه كله مشغول لدرجة انه بينام مهدود من كتر التعب 
لكنه حاسس فراغ كبير ... طب ازاي ؟
في الجيم لقيت ناس بتحاول تاخد وقت من وقت البيت عشان تيجي اللي جايه عشان جوزها مسافر وعايزاه لما يرجع يلاقيها حلوه واللي بتحاول تضيع الطاقه اللي جواها واللي زي حالاتي حست انها عاوزه تخس شويه وتشغل بالها وفيه اللي حابب يظهر دايما بشكل حلو المهم ...
لما بسمع حواديتهم بلاقي ان شغل البيت عندهم عادي زي اي حد ممكن يخلص ف ساعه ومع ذلك دايما يقولوا مشغولين يمكن يكون احساسي غلط لا هو اكيد غلط الانسان لما بيحب حاجه بيضيع كل وقته عليها وبيركز كل اهتمامه ليها يعني الام حابه تقضي وقتها كله مع ابنها حتي اللحظه اللي بتبقي فيها بره البيت هي عندها وقت كافي لكنها بتحسه قليل جدا طول ما هي مع ابنها 
يعني ممكن تكون في فتره ركزت اهتمامك علي حد معين حبيته او حسيته واتمنيت ان وقتك كله لا اتمنيت ان يبقي فيه وقت فوق الوقت العادي عشان هو يستاهل اكتر من كده 
هو ده بالظبط الفراغ مش وقت كبير والمفروض اقضيه الفراغ هو انك تعيش حياتك من غير ما تحب او تحس بالامان عشان كده لازم تعيش كل لحظه بالحب مع اصحابك او اقاريبك او شغلك او هوايتك موهبتك ساعتها مش هتنام مهدود من كتر التعب ولا هتشتكي من الفراغ بالعكس هتحس برضا غير عادي <3

حبيبه

السبت، 20 أبريل 2013

مشاعر

فكرت أقرب ملقتش حب .. فكرت ابعد مجاليش قلب ..
لكن ف حيرتي مرتاحه ..
انا لسه بحلم وليه رب ♥
 
اللي يشوف قوته
ف ضعف غيره
زي اللي باع اخرته
واشتري دنيا بخيله
بس هتعمله ايه
ما باليد حيله
من حقك انك تحب دي حريه لكن متضايقش اللي بتحبه لو بيحب غيرك...

من حقك انك علي اد ماتقدر متجرحش حد بيقرب منك وانت مش بتحبه لكن متضيعش عمره جنبك ....
من حقك انك تمشي في الشارع وتاكل بس تدي لاي حد بيبصلك ومش قادر ...
من حقك انك تلبس اللي ا
نت عايزه بس متتكلمش عن سعره ادام حد هدومه قديمه ...
من حقك تعيش حياتك زي ماانت عايز اللي مش من حقك ان ده يجرح غيرك
وافتكر مهما كان ... داين تداااااااااااااااااااان ولو مش ف الدنيا هتدان يوم ما يغضب عليك الدياااان

 
ياكل ما املك في أحلامي
وفي واقعي
ياألعابي البسيطه
لاتنفعلي
لاتحدثي ضجيجا
مهما سمعتي خارجا
من اصوات البشر
وهي تؤذي بعضها
فقط احتويني
وضمي ما تبقي منكِ ومني
رانيا الجبالي

الخميس، 24 يناير 2013

صــــــــــــــــــــــور مــــرســــــومــــــة


 

علي انغام الامل برسم حكايه
معايا فيها ولا مش معايا
لو قلت معايا هلاقي الأمان
ولو سبتني يبقي الأمل معايا
ومادام فيه امل يبقي حلوه النهايه



وف وسط موال حزني هغني وابتسم
وهضحك غصب عني وارضي باللي يتقسم
والضحكه حتي لو فيه دموع لازم ترتسم
اصلي احب افرح حبايبي
فيهم ناس تحب ضحكتي عشان تبتسم
 
 
دي حقيقه ولا يمكن بيتهيألي
انا حاسه انه بيشتاقلي
وان حنينه جواه ماليه
وهيجي يوم والاقيه بيندهلي
 
 
 
 
مع كل آذان فجر بدعي
اسمع عنك كل خير
وف اوقات يغلبني دمعي
ويبقي قلبي للحزن اسير

...
واصلي واسجد الاقي نور
هزم ضلمة قلبي وروحي
وبعد ماكان بينا سور
احس روحك سكنت روحي
 
 
 
الله عليك ياصوت الناي
ياللي خارج من شفايف الحزن
ياللي عشقاك شفايفي ازاي
هتحرمني يوم من ده الحضن

...
ياللي صوتك بيواسي غربتي
وبلاقي روحي معاك ليها معني
صوتك دليلي لو تاهت سكتي
يلا اعزف لحن رحيلي وسمعنا
 
 
 
رانيا الجبالي

الاثنين، 14 يناير 2013

ازاي

 
وازاي تشتكي من الحزن 
 لو حامل هموم الناس
هو فيه اجمل من قلب يحن
كله خير مليان احساس

ازاي عايز تكون شمعه
...
تنور لغيرها وهي مطفيه
ماهي كده تنور بدمعه
علي جوانبها وتموت بحنيه

لو احساسك بغيرك بيكبر
والحزن جواك بقي أكبر
افتكر ان الشر بيقل
كل ما الخير جذوره تكتر

اللي بيموت عشان غيره
بيفضل عايش جوه القلوب
واللي عايش وباع ضميره
بيبقي خيال باسم مكتوب

خليك زي الشمعه وهي بتتحرق
بتموت عشان غيرها يشوف سكته
ايد دايما تنجي غيرها من الغرق
صوت حر يموت لو اخدوا حريته

                                                                             رانيا الجبالي




الأربعاء، 9 يناير 2013

خــــــــــــيـــــــــــر

الحمد لله الام السوريه وابنها سكنهم هيتظبط النهارده وكماليات البيت من اجهزه وسرير وخلافه هيكون موجود محتاجين مساعدات ماديه ليهم وبرضو اللي عاوز يوصل الفلوس بنفسه ويتأكد من هويتهم يتفضل واللي عاوز يساهم او يجمع ليهم من جيرانه يبلغنا برساله علي الصفحه او علي الرقم ده 01229267357 مبسوطه جدا ان فيه ناس قلبها كبير ساهمت بحاجات كتير ليها :) ومستنين مساعدتكم
rania

الثلاثاء، 8 يناير 2013

حيـــــــــاه





من زمان مكتبتش علي المدونه مع اني كنت بكتب كل حاجه هنا وبحريه علي المدونه القديمه وبعدها هنا لما لغيت القديمه بس بقيت اخاف اكتب احساسي بقيت بخاف ان حد يفهمني او يعرف شخصيتي بس احساسي بالناس عمري ما هبطل اكتبه 
النهارده جت اسره سورية وقعدت في بيت جنبنا ام وابنها وبيحاولوا انهم يجمعوا فلوس عشان يجيبوا بقية العيله خصوصا انهم مش معاهم جوازات سفر وهيجوا تهريب 
الست من غير ما تتكلم الدموع لامعه لوحدها في عنيها
استغربت جدا مننا بنشكي علي جرح من حب او شوية تعب من برد او اكتئاب من وحده 
لكن تدمير حياه بحالها الست دي حالتها الماديه كانت عاليه وبيتها اتقذف في حمص واضطرت تهرب للبنان ومن هناك لمصر سابت بناتها مع زوجها في لبنان وجت مع ابنها لمصر كان لازم راجل مع حد من الاتنين البنات او الام لازم حمايه ليهم من نفوس الناس الضعيفه خصوصا ان بناتها لو شبهها يبقوا قمرات :) 
بتطلع تجمع فلوس عشان تجيب بناتها وزوجها عشان تعيش معاهم بنساعدها ف ده لكن اوقات بلاقي رد عجيب من ناس اللي بتحاول تبين انها متعاطفه بالكلام بس 
وهي هتجيبهم فين وهتعرف طريقهم تاني منين وممكن بعد ده كله يقولك اوك هساعد ويسيبك ويمشي وفيه غيرهم يقولك السورين جايين هنا عشان يشحتوا 
غريبه اوي الناس ساعات يقولوا اوعي تدي للشحات فلوس اصلا هو مش محتاج ده معاه كتير 
طيب هفترض انه معاه فلوس اللي انت هتطلعه من معاك تديهوله هيأثر معاك ؟ 
ادي وانت ونيتك وهو وتصرفه 
زي الطفل اللي بيبيع مناديل هتخسر حاجه لو اديته فلوس مش عاوز تديه وبتقول ان وراه ناس بتاخد الفلوس دي هاتله اكل اديله بسكوت او شيكولاته او لعبه حسسه انه طفل وحسس نفسك انك انسان بني ادم عندك احساس بغيرك مش كل احساسك بالاخر بيتلخص في الكلام وبس 
تخيل نفسك خسرت كل حاجه بيتك واهلك بتحاول تجمعهم وشوف كده هتشحت ولا هتعمل ايه ؟
حاول تساعد من غير ما تفكر اوي الناس دي بتعمل ايه بالفلوس الاهم من تفكيرك هو نيتك بأن الفلوس اللي بتدفعها بتتمني بيها تسعد غيرك وبس
فكر في غيرك حتي لو انت شايف انه ميستهلش لان ممكن يكون عقلك انت اللي مبيفكرش وصدقني لو بدأت تفكر في كل جنيه بطلعه رايح فين قلبك هيبطل يدق ومشاعرك هتموت وهتبقي عايش جسم وبس
رانيا الجبالي